Монгол Улсын Засгийн газрын 2024-2028 оны үйл ажиллагааны хөтөлбөрт заасан төрийн худалдан авах ажиллагааны бодлогыг шинэчлэх зорилгын хүрээнд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль /Шинэчилсэн найруулга/-ийн төслийг боловсруулж, хуулийн төсөлд санал авах зорилгоор Орхон аймаг 2025 оны 02 дугаар сарын 25-ны өдөр Хойд бүсийн хэлэлцүүлгийг зохион байгууллаа.
Тус хэлэлцүүлэгт Монгол Улсын Их Хурлын гишүүн, Ёс зүй, дэгийн байнгийн хорооны дарга Б.Баярбаатар, Монгол Улсын Их Хурлын гишүүн С.Эрдэнэбат, Д.Үүрийнтуяа, Сангийн яамны Худалдан авах ажиллагааны бодлогын хэлтсийн дарга Г.Гийхнаран, зөвлөх Д.Номингэрэл, Төрийн худалдан авах ажиллагааны газрын дарга Ц.Батзул, Хуулийн хэлтсийн дарга А.Оюунжаргал нар болон Орхон, Хөвсгөл, Булган аймгийн Худалдан авах ажиллагааны газар, “Эрдэнэт үйлдвэр” ТӨҮГ-ын төлөөлөл, төрийн болон орон нутгийн өмчит компаниуд болон иргэд, орон нутгийн жижиг, дунд үйлдвэр эрхлэгчидтэй уулзаж, хэлэлцүүлэг өрнүүллээ.
Хэлэлцүүлгийн үеэр Орхон аймгийн Худалдан авах ажиллагааны газраас орон нутагт тулгамдаж буй асуудал сэдвээр мэдээлэл хийж, хэлэлцүүлэг зохион байгуулалтад хамтарч ажиллаа.
Хуулийн шинэчилсэн найруулгын онцлох зохицуулалтуудын талаар дурдвал:
– Бараа, ажил, үйлчилгээ нийлүүлэгчийг сонгох үндсэн шалгуурт чанарыг баримтлана;
– Мега төслүүдийн тендер шалгаруулалтыг зохион байгуулах эрх зүйн орчныг бүрдүүлэх, гэрээний хэрэгжилтийг олон улсын жишигт нийцүүлнэ;
– Худалдан авах ажиллагаанд хиймэл оюун ухаан ашиглах эрх зүйн зохицуулалтыг боловсронгуй болгож, шийдвэр гаргах үйл явцыг хурдасгаж, үр ашгийг нэмэгдүүлнэ;
– Тендер шалгаруулалтын гомдлыг шатлалаар хянана;
– 10 тэрбум хүртэлх төсөвт өртөгтэй тендер шалгаруулалтад оролцоход тендерийн баталгаа шаардахгүй бөгөөд тендер шалгаруулалтад оролцоход хариуцлагатай оролцохыг баталгаажуулж хариуцлагын мэдэгдэл авна;
– Хариуцлагын мэдэгдлээ хоёроос дээш удаа зөрчвөл оролцох эрхийг хязгаарлана;
– 10 тэрбумаас дээш төсөвт өртөгтэй тендер шалгаруулалтад оролцоход төсөвт өртгийн 2 хувьтай тэнцүү хэмжээний баталгаа шаардана зэрэг төрийн худалдан авах ажиллагаанд томоохон эрх зүйн өөрчлөлтүүдийг оруулахаар тусгаад байна.
Уг хуулийн төсөлтэй доорх холбоосоор орж танилцаж, саналаа өгнө үү.
https://user.tender.gov.mn/mn/news/detail/1740368755613
ТОДРУУЛГА МЭДЭЭЛЭЛ АВАХ ЭХ СУРВАЛЖ:
Худалдан авах ажиллагааны газрын ахлах мэргэжилтэн Д.Эрдэнэсүх
Манай хаяг: Орхон аймаг Баян-Өндөр сум Хүрэнбулаг баг, Нутгийн Удирдлагын ордон, Цахим төв
Өрөөний дугаар: 102 тоот
Холбогдох утас: 70358570
И-Мэйлl: Erdenesukh.d@or.spa.gov.mn
