ХУДАЛДАН АВАХ АЖИЛЛАГААНЫ ГАЗРЫН ТҮҮХЭН ЗАМНАЛ
Худалдан авах ажиллагааны алба /2013-2016 он/
Худалдан авах ажиллагааны газар нь анх Монгол улсын Засгийн газрын 2012 оны 144 дүгээр тогтоолыг үндэслэн Орхон аймгийн Засаг даргын 2013 оны 01 сарын 09-ний өдрийн А/11 захирамжаар Засаг даргын дэргэдэх “Худалдан авах ажиллагааны алба” нэртэйгээр 5 хүний бүрэлдэхүүнтэй байгуулагдаж, Төрийн болон орон нутгийн өмчийн хөрөнгөөр худалдан авах ажиллагааг зохион байгуулах, хэрэгжүүлэх, гүйцэтгэлд хяналт тавих, тайлагнах ажлыг орон нутагт хэрэгжүүлж ирсэн. Тус алба нь 2014, 2015, 2016 онуудад Сангийн яамны Худалдан авах ажиллагааны хэрэгжилтэд хийсэн үнэлгээгээр улсад тэргүүлж, 2016 онд хамгийн олон тендер цахимаар зарласан анхны аймаг, Авлигатай тэмцэх газраас хийсэн Ил тод, нээлттэй байдлын үнэлгээгээр 82 оноогоор улсад тэргүүлсэн, Аймгийн төр захиргааны байгууллагуудын 2015 оны үйл ажиллагаанд хийсэн хяналт-шинжилгээ, үнэлгээний дүнгээр тэргүүлж Орхон аймгийн “Шилдэг байгууллага”-аар шалгарсан.
Орон нутгийн өмчийн газар /2016-2023 он/
Монгол улсын Засгийн газрын 2016 оны 8 дугаар сарын 03-ны өдрийн 9 дүгээр тогтоолыг үндэслэн Орхон аймгийн Засаг даргын 2016 оны 09 дүгээр сарын 12-ны Б/35 дугаар захирамж, 2016 оны 09 дүгээр сарын 20-ны өдрийн А/471 захирамжийн дагуу Худалдан авах ажиллагааны алба, Өмчийн харилцааны газрыг нэгтгэн “Орон нутгийн Өмчийн газар” болгон 14 хүний орон тоотойгоор байгуулагдаж орон нутгийн өмчийн болон худалдан авах ажиллагааны чиг үүргийг холбогдох хууль тогтоомжийн хүрээнд хэрэгжүүлэн ажилласан. Тус газар нь 2017-2023 онуудад Худалдан авах ажиллагааны мэргэжлийн байгууллагуудаас улсад тэргүүлж, 2016, 2017, 2021 оны Аймгийн төр захиргааны байгууллагуудын үйл ажиллагаанд хийсэн хяналт-шинжилгээ, үнэлгээний дүнгээр тэргүүлж Орхон аймгийн “Шилдэг байгууллага”-аар шалгарч амжилттай ажилласан.
Худалдан авах ажиллагааны газар /2024 оноос хойш/
Монгол улсын Засгийн газрын 2023 оны 08 дугаар сарын 30-ны өдрийн 312 дугаар тогтоолоор “Аймгийн Засаг даргын тамгын газрын бүтэц, орон тооны хязгаарыг тогтоох тухай” 2021 оны 377 дугаар тогтоолд нэмэлт өөрчлөлт оруулж Аймгийн Засаг даргын эрхлэх асуудлын хүрээнд “Худалдан авах ажиллагаатай газар”-тай байхаар тогтоосон. Үүний дагуу Орхон аймгийн Засаг даргын 2023 оны 11 дүгээр сарын 02-ны өдрийн А/845 захирамжаар “Худалдан авах ажиллагааны газар”-ыг 10 хүний бүтэц орон тоотойгоор байгуулж, 2024 оны 01 дүгээр сарын 01-ний өдрөөс эхлэн орон нутагт Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль, журмыг хэрэгжүүлж байна.
Дэлгэрэнгүй мэдээлэл авах эх сурвалж:
Хүний нөөц, дотоод ажил хариуцсан ажилтан: Б.Ариунжаргал
Холбоо барих утас: 70354547
Ariunjargal.b@or.spa.gov.mn
